 |
| قصة غريبة تحدث لصديقتي بعد ان كان فاضل على كتب الكتاب 15 يوم |
اليكم هذه القصة الغريبة التي حدثت لاغلي صاحبة فى حياتي، شئ غريب له العجب المهم صحبتي اتخطبت لمدة سنتين بالظبط كان فاضل على كتب الكتاب بتاعها 15 يوم بالظبط وكان هتبقي عروسة زي القمر منورة الكوشة وكلنا كنا فرحانين بيها واخيراً بقي فرح ولمة الصحبة واللي كان بعيد هيقرب واللي ما شوفنهوش بقالنا سنين هنشوفه فى اليوم دة لكن!!!!!!!!!
بدون اي مقدمات قررت انها مش هتكمل
وقالت صحبتي لأهلها انها عايزة تفشكل ومش عاوزه العريس الكل استغرب وكل اللي حواليها يسألوها عن السبب وهي مش راضية حتى توضح لحد ما ف الاخر اعترفت وقالت " مادانيش اي حاجة ف وقتها "....- بيطمن عليا بعد ما اخف!!!
- بيسأل عن امتحاني الصعب اللي مرعوبة منه وحكياله عليه بعدها بإسبوع!!!
- هدية عيد ميلادي حتى بتيجي متأخر!!!
- كل حاجه كنت بشوفها منه كانت باردة ومالهاش اي طعم !!!
حكاية حقيقة برضو حصلت مع واحدة صحبتي بس دي متجوزة
في يوم حصل مشكلة بينها وبين جوزها وصلت المشكلة دي انهم فضلوا مخاصمين بعض اربع ايام بحالهم هما متجوزين ف محافظة تانية بعيد عن أهلها وف ايام خصامهم نزلت تشتري حاجات ليها من مكان جنبهم....هي كانت فاكرة انها عارفة شوارعه كويس نزلت واشترت ولفت كتير والمفروض مروحة بقى ماعرفتش هى فين بتبص حواليها مش عارفة اي محل ولا مألوف ليها اي يافطة او عنوان تروح هنا تروح هناك مش عارفة ترجع تانى وتدخل من اي شارع تتوه اكتر
قامت واقفة في مكان وفضلت تعيط و طلعت تليفونها واتصلت بجوزها رد عليها وقالت له " انا تايهة ومش عارفه انا فين ولا عارفه أعمل حاجة " وده كله طبعا بعياط.....
قعد يقول لها " اهدى بس انا معاكي اهو ، قومي بس اسألي اي صاحب محل عندك واعرفي منه أسمه ايه عشان أعرف اجيلك ياحبيبتى ، اطمني انا معاكي ومش هسيبك ومش هقفل الخط وجايلك دلوقت حالا "وبعد لف كتيير وصل ليها وشافها وجري عليها وهي من الخوف ماكنتش مصدقة انه هو ، وبعد مااستوعبت قامت معيطة ومستخبية فيه ..
عدى كام سنة ع الموقف دة وهي مش نسياه،بتقول انه كل ما شيطاني يوزني انكد عليه ،قلبي مايطاوعنيش و تيجي ف بالي صورة الوقت اللي كنت عاوزة فيه امان وكان هو اماني وحمايتي ...
ازاي اعيش حياتي
في ثقافة اسمها * ثقافة الوقت *حاجة معينة عاوزينها ف الوقت دة لو اتأخرت لحظة واحدة عن وقت احتياجنا مش هنعوزهاكل حاجة ليها وقتها .. كل حاجة حرفيا زي ( الإحساس - و الكلمة - و المعايدة - و الطبطبة - و الحضن - والنظرة- الخ... )
زى ما الحاجة الساقعة لو سخنت مش بيبقى ليها طعم،وزي لما الدوا بيجى متأخر مابيبقاش ليه فايدة ولا بينفع،وزي الجدعنة اللي لو ماظهرتش ف الشدة مش بتبقى جدعنة،كل حاجة وتوقيتها ولو خرجت عن التوقيت دة بتفقد قيمتها....